Tuesday, September 21, 2021
BallinaThesarClark në takim me Kurtin: Kosova është histori suksesi për SHBA-të

Clark në takim me Kurtin: Kosova është histori suksesi për SHBA-të

Në shoqërimin e ministrit të Mbrojtjes, Armend Mehaj dhe ministres së Ekonomisë, Artane Rizvanolli, kryeministri i Kosovës, Albin Kurti, priti në takim ish-komandantin suprem të forcave aleate të NATO-s në Evropë gjatë viteve 1997-2000, gjeneralin Wesley K. Clark.

Me këtë rast, u tha se intervenimi i NATO-s në Kosovë përbën një moment kthese në historinë e vendit dhe popullit tonë.

Kurti e falënderoi gjeneralin Clark për udhëheqjen e tij në intervenimin vendimtar të NATO-s, kundër Jugosllavisë së Milosheviqit në pranverën ‘99, për funksionin dhe kontributin e pazëvendësueshëm të Shteteve të Bashkuara të Amerikës, dhe ritheksoi vendosmërinë e Republikës së Kosovës për të qenë anëtare e NATO-s.

Kryeministri gjithashtu e falënderoi për vullnetin e shprehur të gjeneralit Clark për të ofruar këshilla profesionale për ministrin Mehaj.

Gjenerali Clark e uroi kryeministrin Kurti për pozitën e re dhe për të arriturat e deritanishme të qeverisë.

- Reklama -

Ai shprehu mbështetje për synimet e qeverisë për zhvillim ekonomik dhe prosperitet mbarëshoqëror.

Shteti i Kosovës është miku më i madh i Shteteve të Bashkuara të Amerikës në Evropë, shtoi gjenerali Clark, teksa rikujtoi herën kur presidenti Bill Clinton, pas vizitës së tij të fundit në Kosovë, i kishte thënë se Kosova është gjëja më e mirë që e ka bërë gjatë presidencës së tij tetë vjeçare.

Më tej, ai tha se Kosova është histori suksesi për Shtetet e Bashkuara të Amerikës, si asnjë tjetër.

ARTIKUJ TË NGJAJSHËM

MË TË SHIKUARAT