Turqia doli nga mbyllja e saj më e rreptë mbarëkombëtare që synonte të frenonte koronavirusin, por ora e ndalimit të natës dhe fundjavës do të mbetet e pandryshuar.
Ndërsa shumë kufizime gjatë ditës janë zbutur deri më 1 qershor, banorëve u kërkohet të qëndrojnë në shtëpi nga ora 21:00 deri në 05:00 gjatë ditëve të javës dhe për tërë fundjavën, me përjashtime të tilla si ecja në tregun më të afërt për të blerë ushqime.
Lockdown-i 17-ditor u vendos pasi infeksionet e reja të përditshme tejkaluan një lartësi historike prej më shumë se 60 000 në muajin prill, ndërsa ritmi i vaksinimeve u ngadalësua.
Ministria e Brendshme theksoi që qendrat tregtare do të jenë të hapura gjatë ditëve të javës.
Kinematë, ambientet sportive dhe baret mbeten të mbyllura. Shkollat do të vazhdojnë me programet e tyre të mësimit në distancë.
Presidenti Recep Tayyip Erdogan tha se qëllimi ishte të zvogëloheshin rastet e reja ditore në më pak se 5 000 dhe gjithashtu të ringjallte industrinë thelbësore të turizmit.
Më shumë se 10 500 infeksione të reja janë raportuar në 24 orët e fundit në vendin me 84 milionë banorë.
Numri i përgjithshëm i rasteve ka tejkaluar 5,1 milionë që nga marsi i kaluar, ndërsa numri i të vdekurve është 44 760.
Gati 26 milionë persona morën vaksinën e tyre të parë, por vetëm 10,9 milionë u vaksinuan plotësisht me dozën e dytë./ATSH
