Organizata e Veteranëve të Luftës së Ushtrisë Çlirimtare të Kosovës një ditë më parë ka kërkuar që institucionet e Kosovës të ofrojnë garanci për lirimin me kusht të ish-krerëve të Ushtrisë Çlirimtare të Kosovës (UÇK), të cilët janë duke u gjykuar dhe po mbahen në paraburgim në Hagë. Mirëpo, nga Qeveria e Kosovës thonë se nuk mund të shërbejnë si garantuese e lirimit të tyre, pasi Gjykata Speciale ligjërisht është e Kosovës.
Pamundësinë e garantimit të Qeverisë për lirimin me kusht të akuzuarve nga Specialja e ka konfirmuar për Telegrafin zëdhënësi i Qeverisë së Kosovës, Përparim Kryeziu.
Sipas tij, bazuar nga dispozitat ligjore garancia nuk kërkohet nga shteti amë nga i cili vjen i akuzuari.
“Gjyqtari Kai Ambos, në opinionin e tij të ndarë nga vendimi për refuzimin e kërkesës për lirim me kusht, eksploron mundësinë që në të ardhmen ‘shtete të treta’ të mund të shërbejnë si garantues të mundshëm për ndonjë të akuzuar. Por, Kosova nuk është ‘shtet i tretë’, sepse Gjykata është ligjërisht e Kosovës. Bazuar në dispozitat ligjore, garancia nuk kërkohet as nga shteti amë (Kosova) e as nga kryeministri i shtetit amë [Qeveria e Republikës së Kosovës], nga i cili vjen i akuzuari dhe të cilit shtet i takon Gjykata Speciale me juridiksion. Pra, Kosova nuk mund të shërbejë si garantues, ashtu siç po raportohet”, ka thënë ai.
E, sa i përket krahasimeve të Gjykatës Speciale me gjykata ndërkombëtare, sikurse me Tribunali i Hagës, Kryeziu thotë se këto krahasime janë të paqëndrueshme.
“Krahasimet e Gjykatës Speciale me gjykata ndërkombëtare, sikurse me Tribunalin e Hagës janë të paqëndrueshme, si në raport me vetë gjykatat – njëra vendore e tjetra ndërkombëtare – ashtu edhe në raport me personat/institucionet që kanë pasur mundësi të ofrojnë garanci”, tha ndër të tjera Kryeziu.
Ndryshe, ministrja e Drejtësisë, Albulena Haxhiu, sot ka thënë se deri tani nuk kanë pasur kërkesa për garanci për të akuzuarit, as nga ana e mbrojtjes së të akuzuarve nga Dhomat e Specializuara e as nga vet Gjykata Speciale.
