Në 22 vjetorin e bombardimeve të NATO-s ndaj forcave serbe për të zgjidhur krizën humanitare në Kosovë, zëvendës shefja e misionit të OSBE-së, Elisabeth Rosenstock-Siller, ka dhënë një fjalim në Këshillin e Përhershëm në Vjenë.
Ajo ka thënë se para dhe gjatë gjithë fushatës, u bënë të gjitha përpjekjet për të detyruar regjimin e Millosheviçit – përmes mjeteve paqësore – për të ndaluar fushatën e tij brutale dhe të tmerrshme të spastrimit etnik.
“Përdorimi i forcës i NATO-s ishte i domosdoshëm dhe legjitim. Këshilli i Sigurimit i OKB kishte shprehur shqetësimet rreth kërcënimit që gjendja e rëndë humanitare në Kosovë dhe numri në rritje i refugjatëve përbënin rrezik për paqen dhe sigurinë ndërkombëtare. Sot, ndërsa shënojmë Operacionin Forca Aleate, ne kujtojmë qindra mijëra njerëz të pafajshëm të dëbuar nga shtëpitë e tyre dhe mijëra të cilët u vranë ose u zhdukën për shkak të nacionalizmit të dhunshëm të regjimit të Millosheviçit dhe forcave të tij”.
“Në 22 vjetorin e ndërhyrjes së NATO-s, është detyrë e qeverive të Serbisë dhe Kosovës të sigurojnë që viktimat dhe familjet e tyre të kenë qasje të plotë në drejtësi dhe informacion në lidhje me fatin e të dashurve të tyre”.
Ajo ka shtuar se i vjen keq për humbjen e jetëve të pafajshme civile, përfshirë ata që u zhdukën gjatë këtij operacioni ushtarak.
“Ne mbështesim një Kosovë multietnike dhe të pavarur në paqe me fqinjët e saj, duke ndjekur një rrugë evropiane së bashku me Serbinë. Në të njëjtën kohë, Serbia është një mik i mirë i Shteteve të Bashkuara dhe një partner i NATO-s. Serbia u bashkua me programin e Partneritetit për Paqe të NATO-s në 2006. NATO stërvitë ushtarët serbë për të kontribuar në misionet paqeruajtëse ndërkombëtare, ka punuar me Serbinë në forcën e sigurisë dhe reformën e institucioneve dhe ka investuar miliona euro për të ndihmuar Serbinë të shkatërrojë më shumë se 200 tonë municione”.
Sipas saj, Shtetet e Bashkuara mbështesin fuqimisht një të ardhme demokratike, të begatë dhe paqësore për Ballkanin perëndimor dhe njohin rolin e rëndësishëm të Serbisë në këtë proces.
“Ne inkurajojmë Serbinë dhe Kosovën të ndërmarrin hapa për të normalizuar marrëdhëniet dhe të mbështesin plotësisht Dialogun e lehtësuar nga BE midis Serbisë dhe Kosovës që synon një marrëveshje gjithëpërfshirëse të normalizimit – e cila duhet të përqendrohet në njohjen reciproke. Kjo do të kërkojë kompromis nga të dy palët. Status quoja është e paqëndrueshme dhe kjo parandalon si Serbinë ashtu edhe Kosovën të arrijnë potencialin e tyre të plotë”.
“Le të nderojmë kujtimin e atyre që humbën jetën duke punuar së bashku për të ndërtuar një të ardhme paqeje dhe prosperiteti për fëmijët e Ballkanit perëndimor. Mënyra më e mirë për ta bërë këtë është që udhëheqësit e Serbisë dhe Kosovës të kthehen në Dialogun e lehtësuar nga BE”.
