Rruga e Arbrit paraqet mundësi për zhvillimin e turizmit në bashkinë Bulqizë.
E pozicionuar shumë afër Tiranës, Bulqiza synohet të jetë një atraksion turistik edhe për vizita ditore të turistëve që vizitojnë Shqipërinë dhe qëndrojnë në kryeqytet.
Përfaqësues nga autoritetet vendore, sektori privat dhe shoqëria civile u mblodhën për të diskutuar rreth zhvillimit të turizmit në territorin e bashkisë së Bulqizë dhe mundësive që ofron ai.
Takimi u organizua nga Drejtoria e Arsimit, Kulturës, Turizmit, Rinisë, Sportit, Komunikimi & IT në bashkinë Bulqizë, në bashkëpunim me Fondacionin ALCDF. Diskutimi u fokusua në tema me karakter informues rreth zhvillimit të turizmit, destinacionit turistik, si edhe çështje apo tendenca të sektorit të turizmit në territorin e Bashkisë Bulqizë.
Të pranishmit vlerësuan fushatën që bashkia Bulqizë ka vijuar për promovimin e vendeve turistike që ndodhen në territorin e saj, duke synuar përfshirjen e tyre në axhendat turistike të agjencive të ndryshme.
Në diskutimet në këtë takim u vlerësuan edhe mundësitë e zhvillimit që do të ketë turizmi në Bulqizë pas përfundimit të rrugës së Arbrit. /ATSJ
