Para katër vitesh, gazetari nga Kosova, Sulejman Gashi pësoi një sulm kardiak gjatë një udhëtimi pune në qytetin Salt Lake City në SHBA. Që atëherë u përball me gjendjen komatoze nga e cila për fat të keq asnjëherë nuk doli.
Ish-gazetari Sulejman Gashi ka vdekur sot, ndërsa lajmin e ka bërë të ditur djali i tij, Drilon Gashi, përmes një statusi në Facebook, i cili thotë se i ati po luftonte të rikthehej nga gjendja e rëndë që kishte pësuar katër vite më parë.
“Ai po luftonte shumë që të rikthehej nga gjendja e rëndë që kishte pësuar katër vite më parë. Varrimi i të ndjerit do të bëhet në vëndlindjen e tij në Kosovë, vendin të cilin ai e deshi aq shumë. Sulejman Gashi bëri një jetë, dhe la një vepër, me domëthënie të jashtëzakonshme për familjen, profesionin, vendin dhe kombin e tij”, ka shkruar ai.
