Presidenti i Kosovës Hashim Thaçi, iu ka adresuar mediave ditën e hënë duke folur kështu lidhur me arritjen e marrëveshjes ekonomike në mes të Kosovës dhe Serbisë, marrëveshje kjo e cila u nënshkrua nga kryeministri i Kosovës Avdullah Hoti dhe presidenti i Serbisë Aleksandar Vuçiq, në praninë edhe të presidentit të Shteteve të Bashkuara të Amerikës Donald Trump.
Thaçi tha se përkrahja e Shteteve të Bashkuara të Amerikës për Kosovën ka qenë e përhershme.
Ai përmendi takimet me presidentin e SHBA-ve Donald Trump, duke e quajtur Kosovën si vend i mrekullueshëm.
“Në të gjitha takimet që kam zhvilluar me Presidentin Trump, më ka folur për Kosovën si një vend të mrekullueshëm”.
I pari i vendit marrëveshjen e nënshkruar nga Hoti e vlerëson si përpjekje dyvjeçare nga ana e Kosovës.
Këtu Thaçi përmend kontributin që vlerëson se e ka dhënë vetë ai.
“Ndihem i lumtur dhe krenar që pas përpjekjeve dhe punës së përbashkët për dy vjet, të premten e kaluar arritëm që në Shtëpinë e Bardhë të formalizohen këto marrëveshje”.
Ai marrëveshjet e nënshkruara të premten, i ka quajtur si hapin më serioz të Shteteve të Bashkuara për Ballkanin Perëndimor.
“Hasëm në vështirësi, pengesa, konspiracioni nga shumë anë. Me formalizimin e marrëveshjes, u konfirmuar se ato kanë qenë të rrejshme dhe paragjykuese”.
Thaçi e ka quajtur angazhimin e ambasadorit Richard Grenell si energjik dhe shumë profesional.
