Policia e Kosovës ka realizuar një operacion në rajonin e Prishtinës dhe Gjilanit në koordinim me Prokurorinë e Shtetit në vazhdën e angazhimeve në parandalimin e veprave kriminale ku u prangosën gjashtë persona të dyshuar teksa janë konfiskuar mbi 82 kilogramë substanca narkotike, armë dhe automjete të ndryshme.
Arrestimi i personave të dyshuar është bërë mbi dyshimin e bazuar për përfshirje në veprat penale “Blerja ,posedimi shitja dhe shpërndarja e paautorizuar e narkotikëve, substancave psikotrope ose analoge”, “Mbajtja nën kontroll dhe shfrytëzim i paautorizuar i armëve”, “Prodhimi dhe shpërndarja e produkteve të dëmshme mjekësore dhe pa banderolë” si dhe “Shmangia nga pagesat e detyrueshme doganore ose tarifave akcizore”, njofton Klankosova.tv.
Me urdhër të prokurorit të rastit janë bastisur edhe katër lokacione – dy prej tyre banesa të banimit, njëra në Prishtinë dhe tjera në Fushë Kosovë, si dhe dy shtëpi në Gjilan së bashku me një objekt përcjellës, të cilat dyshohet se grupi në fjalë i kanë përdorur për fshehje, shitje dhe shpërndarje të narkotikëve, si dhe për kontrabandë të barnave me origjinë të dyshimtë.
