Tirana do të mirëpresë sot liderët e rajonit, në samitin që do të zhvillohet për Ballkanin Perëndimor.
Drejtuesit më të lartë të Kosovës, Serbisë, Maqedonisë së Veriut, Malit të Zi dhe Bosnje Hercegovinës do të shkojnë në Shqipëri në e samitin, i cili zhvillohet në Pallatin e Brigadave. Samiti do të drejtohet nga kryeministri shqiptar, Edi Rama dhe komisioneri europian për Zgjerimin, Oliver Varhelyi.
Ky Samit është shumë i rëndësishëm pasi vjen vetëm dy javë para vendimit të pritshëm në Bruksel për nisjen e negociatave për Shqipërinë dhe Maqedoninë e Veriut. Drejtuesit e 6 shteteve të Ballkanit perëndimor Shqipëria, Kosova, Serbia, Maqedonia e Veriut, Bosnje Hercegovina dhe Mali i Zi do të diskutojnë për projektet në rajon në kuadër të Procesit të Berlinit.
Në këtë samit pritet të firmosen marrëveshje të rëndësishme në sektorin ekonomik, si ajo e Shqipërisë me Maqedoninë e Veriut për lehtësimin e kalimit të mallrave ose tregtisë në të gjitha pikat e kalimit doganor dhe veçanërisht në Qafë-Thanë. Në këtë takim Shqipëria pritet të kërkojë nga BE njohjen reciproke të certifikave të gjelbra të vaksinimit. Po ashtu, përshpejtimi i procedurave për uljen e tarifave roaming mes vendeve të Ballkanit Perëndimor dhe BE-së dhe lehtësimi i procedurave tregtare dhe të transportit me vendet kufitare anëtarë të Unionit.
Vitin e kaluar, takimi i 6 liderëve te Ballkanit Perëndimor u zhvillua online, më 10 nëntor dhe u njoh si Samiti i Sofjes. Në këtë samit shtetet e Ballkanit Perëndimor ranë dakord që të fuqizojnë marrëdhëniet mes tyre dhe u pajtuan që të krijojnë treg të përbashkët rajonal, si edhe të adoptojnë politikat e gjelbra./lapsi.al
