Sot, Kryeministri Albin Kurti dhe Ambasadori Gjerman Jörn Rohde së bashku me Ministren e Industrisë, Ndërmarrësisë dhe Tregtisë Rozeta Hajdari dhe Kryetarin e Komunës së Prizrenit Mytaher Haskuka mirëpritën bizneset e para në Parkun e Inovacionit dhe Trajnimeve (ITP) në Prizren. Grupi i parë i bizneseve, sot gjatë ceremonisë u mirëpritën në hapësirat e tyre të reja. Ky grup prej gjashtë bizneseve nga sektorë të ndryshem, siç janë industritë kreative dhe kulturore, automatizimi industrial, shërbimet gjuhësore dhe arsimi dhe trajnimet, tashmë kanë nënshkruar marrëveshjet e tyre të qirasë në ITP në Prizren. Biznese të tjera do të bëhen pjesë e ITP-së gjatë javëve në vijim.
Kryeministri Kurti me këtë rast theksoi: “Jam jashtëzakonisht i lumtur të shoh këtë park, i cili ishte një kamp ushtarak për trupat gjermane të KFOR-it, një vend nga i cili partnerët tanë gjermanë garantuan sigurinë tonë, tani është shëndërruar në një urë lidhëse midis bizneseve vendore dhe atyre ndërkombëtare. Si një qeveri reformiste, ne fuqishëm besojmë në mundësitë transformuese që sjell teknologjia informative dhe do të përpiqëmi të inkurajojmë sa më shumë bashkatdhetarë nga diaspora të investojnë në zhvillimin e biznesit. Ne besojmë se dixhitalizimi është një vegël përmes së cilës veçanërisht të rinjtë tanë mund të jenë pjesë e zhvillimit të qëndrueshëm të Kosovës dhe se studentët tanë janë të motivuar të kërkojnë përmbushje profesionale në Kosovë, në vendin tonë, dhe jo si punëtorë nepër Evropë. Qeveria jonë e sheh ITP-në si një katalizator të rëndësishëm në modernizimin e ekonomisë kosovare dhe ne jemi plotësisht të përkushtuar që nga ky prjekt të bëjmë një storje suksesi.”
Ambasadori Rohde nënvizoi: “Mbështetja gjermane për zhvillimin e përgjithshëm ekonomik të Kosovës dhe posaçërisht për ITP-në në Prizren është e palëkundur. ITP është projekti ynë kryesor në bashkëpunimin bilateral të Gjermanisë dhe Kosovës. ITP ka një potencial të madh për të shërbyer gjithashtu si një destinacion për investime nga diaspora në Gjermani – qoftë në sektorin e TIK, në dixhitalizim, në përpunimin e produkteve ushqimore dhe bujqësore, industritë kreative ose edhe në sektorët tjerë relevant.”
