Të hënën, më 8 mars 2021, UN Women në partneritet me Zyrën e Presidentes dhe Fondacionin IPKO, të mbështetur nga Ambasada Britanike në Kosovë organizuan aktivitetin me gra dhe vajza nga komunitetet Romë, Ashkali dhe Egjiptian, për t’i frymëzuar ato të vazhdojnë arsimin e tyre dhe bëhen udhëheqëse të së nesërmes. Gjatë aktivitetit u hap edhe ekspozita me punimet e vajzave të pranishme, kështu duke treguar se si arti mund të jetë mjet i thyerjes së barrierave, stereotipeve gjinore dhe fuqizimit te vajzave.
Në fjalimin e saj hyrës, Ushtruesja e Detyrës së Presidentës Znj. Vjosa Osmani, deklaroi “Sot, gratë dhe vajzat e reja dëshmojnë se janë të pandalshme kudo që janë. Ato promovojnë arsimimin duke qëndruar kundër dhunës ne baza gjinore, duke kërkuar veprime në lidhje me mjedisin në të cilin jetojnë, dhe mbi të gjitha duke kërkuar vendin që ju takon në proceset e vendimmarrjes. Vetëm së bashku do të bëjmë që zëri i grave dhe vajzave të reja të dëgjohet në çdo tryezë ku merren vendime për to, për shoqërinë dhe për të gjithë botën.”
Fjalim hyrës u mbajt gjithashtu nga Ambasadori Britanik në Kosovë, Z. Nicholas Abbott i cili nënvizoj ndikimin disproporcional të pandemisë mbi gratë dhe vajzat, “Barra e kujdesit për fëmijët dhe të moshuarit ka rënë mbi gratë dhe vajzat, ndërsa në të njëjtën kohë ato kanë vazhduar të punojnë nga shtëpitë e tyre. Dhe kjo situatë ka qenë edhe më e vështirë për ato vajza dhe gra të reja që tashmë kanë qenë në disavantazh edhe para pandemisë. Ne po flasim për gratë dhe vajzat nga komunitetet më të rrezikuara, të cilat jo gjithmonë kanë qasje të lehtë në arsim, trajnim dhe punësim. ”
Ky event u organizua në përputhje me temën globale të këtij viti për Ditën Ndërkombëtare të Grave “Gratë në udhëheqje: Arritja e një të ardhme të barabartë në botën e COVID-19”, ditë kjo e cila vlerëson përpjekjet e jashtëzakonshme të grave dhe vajzave në të gjithë botën në formësimin e një të ardhme më të barabartë dhe rimëkëmbje nga pandemia COVID-19, duke nxjerr në pah boshllëqet që mbeten. Znj. Vlora Tuzi Nushi, Udhëheqëse e Zyrës së UN Women deklaroi “Kur gratë udhëheqin, ne shohim rezultate pozitive. Megjithatë, gratë ende përballen me diskriminim kur bëhet fjalë për udhëheqje. Prandaj, ne kemi nevojë për më shumë gra në vendimmarje që përfaqësojnë gratë dhe vajzat në të gjithë diversitetin dhe aftësitë e tyre, dhe në të gjitha situatat kulturore, sociale, ekonomike dhe politike “.
