Presidenti në largim i SHBA, Donald Trump deklaroi se ishte i indinjuar nga dhuna, paligjshmëria dhe vandalizmat, pasi një grup mbështetësish të tij sulmuan Capitol Hill dhe detyruan të ndalnin një seancë të përbashkët të Kongresit.
Deklarata erdhi ndërsa thirrjet për rrëzimin e tij u rritën dje dhe anëtarë të administratës së tij u larguan pas një 24 orësh të trazuara në Uashington.
Trump nuk e pranoi rolin e tij në nxitjen e trazirave.
Ai premtoi një tranzicion të qetë te presidenti i zgjedhur Joe Biden, i cili e mundi atë në zgjedhjet presidenciale të nëntorit.
Sidoqoftë, në një mesazh për “mbështetësit e tij të mrekullueshëm”, Trump shtoi se “unë e di që jeni të zhgënjyer, por gjithashtu dua që ju të dini se udhëtimi ynë i pabesueshëm sapo ka filluar”.
Udhëheqësit demokratë në Kongres, Nancy Pelosi dhe Chuck Schumer, kërkuan që zëvendëspresidenti Mike Pence të heqë Trumpin sipas amendamentit 25 të Kushtetutës.
“Nëse zëvendëspresidenti dhe kabineti nuk veprojnë, Kongresi mund të jetë i përgatitur të shkojë përpara me fajësimin”, tha Pelosi në një konferencë shtypi.
Sekretarja e Transportit e SHBA, Elaine Chao u bë zyrtarja e parë e kabinetit që njoftoi dorëheqjen pas sulmit në Capitol Hill.
Një tjetër anëtar i kabinetit, sekretarja e Arsimit, Betsy Devos, gjithashtu paraqiti dorëheqjen e saj, sipas ”New York Times”./ATSH
