Ministria e Punëve të Jashtme dhe Diasporës njofton se pas një pune intensive është mundësuar për të gjithë shqiptarët nga Lugina e Preshevës të cilët jetojnë në Konfederatën Zvicerane, që të udhëtojnë drejt Republikës së Kosovës duke përdorur Letërnjoftimin (ID) ose Leje-qëndrimin e vlefshëm biometrik të lëshuar nga shtetet anëtare të BE-së apo shtetet anëtare të Zonës Schengen, ku përfshihet edhe Konfederata Zvicerane.
Posedimi i këtyre dokumenteve, do të mjaftojë për të kaluar transit apo për të qëndruar deri në 90 ditë në territorin e Republikës së Kosovës. Vështirësi të tilla për udhëtim nuk do të paraqiten më as nga aeroporti i Cyrihut apo aeroporte të tjera në Konfederatën e Zvicrës.
Në mungesë të letërnjoftimeve të lëshuara nga autoritetet e Serbisë dhe për shkak të fshirjes së adresave të tyre nga autoritet serbe, deri më sot shqiptarët e Luginës së Preshevës të cilët jetojnë në Konfederatën Zvicerane, janë privuar të udhëtojnë drejt Luginës përmes Republikës së Kosovës.
