Ushtarët italianë dhurojnë pajisje mbrojtëse personale në Klinikën për Sëmundjet Infektive në Prishtinë

Nga
OXYGEN
-
0
70

Ekipi mjekësor ushtarak italian i cili po vepron në Kosovë në mbështetje të institucioneve shëndetësore promovoi dhurimin e maskave të fytyrës dhe kostumeve mbrojtëse për Klinikën e sëmundjeve infektive në Kosovë. Pajisjet u dorëzuan sot nga Ushtarët Italianë të Komandës Rajonale të KFOR-it Perëndim.

“Ekipi Italian përbëhet nga mjekë dhe infermierë nga të gjitha Forcat e Armatosura Italiane dhe po ndihmon strukturat shëndetësore në Kosovë në përgjigjen e tyre ndaj Covid-19, përmes një numri aktivitetesh përfshirë këshillimin mjekësor dhe sondazhet e kryera në të gjithë Kosovën,” shpjegoi Majori Cristian Benegiamo, udhëheqësi i ekipit.

Dr. Lindita Ajazaj Berisha falenderoi ekipin mjekësor ushtarak italian për mbështetjen e tyre dhe për ndarjen e përvojës së tyre të specializuar në menaxhimin e Covid-19 me kolegët e tyre në Kosovë.

KFOR-i po lehtëson aktivitetet e ekipit brenda kornizës së ndihmës së siguruar bashkarisht për Institucionet në Kosovë nga Ministritë Italiane të Mbrojtjes dhe Punëve të Jashtme.

Që nga shpërthimi i pandemisë, KFOR-i ka vazhduar detyrat e tij të sigurisë, ndërsa ka lehtësuar shpërndarjen e ndihmës nga kombet dhe partnerët e NATO-s. Në muajt e fundit, Ushtria Italiane ka dërguar një ekip të specializuar i cili ka kryer dezinfektimin e një numri të lartë të objekteve publike.

“Sot është Dita e Forcave të Armatosura Italiane dhe ne jemi veçanërisht të lumtur ta festojmë atë përmes një donacioni të dobishëm dhe konkret që do të sjellë përfitime për të gjitha komunitetet në Kosovë” tha koloneli Gianluca Figus, kreu i Komandës Rajonale Perëndim të KFOR-it të udhëhequr nga Italia.

ARTIKUJ TË NGJASHËMMË SHUMË NGA AUTORI