Bazuar në Udhëzimin Administrativ (MTI) nr. 01/2018 për ndarjen e mjeteve financiare nga kategoria ekonomike e subvencioneve dhe transfereve, dhe me qëllim të fuqizimit të bizneseve me pronësi apo me bashkëpronësi (se paku 50%) të grave ndërmarrëse, shpallim thirrje të hapur publike për përkrahjen e ndërmarrjeve mikro, të vogla dhe të mesme.
MTI/KIESA do të mbështes në subvencionim me mjete financiare ndërmarrjet sipas kategorive si në vijim:
– Për ndërmarrjet mikro (të punësuar 1 deri 9 punëtor), vlera maksimale që mund të përfitoj një ndërmarrje mikro është deri në 75% e vlerës së projektit ose në vlerë financiare maksimumi deri në 10,000.00 EURO.
– Për ndërmarrjet e vogla (të punësuar 10 deri 49 punëtor), vlera maksimale që mund të përfitoj një ndërmarrje e vogël është deri në 50% e vlerës së projekt ose në vlerë financiare maksimumi deri në 20,000.00 EURO.
– Për ndërmarrjet e mesme (të punësuar 50 deri 249 punëtor) vlera maksimale që mund të përfitoj një ndërmarrje e mesme është deri në 50 % e vlerës së projektit ose në vlerë financiare maksimumi deri në 30,000.00 EURO.
Aplikuesi i cili aplikon për subvencione dhe transfere në Ministri, duhet të jetë i regjistruar në Republikën e Kosovës.
1. Për të aplikuar duhet plotësuar Aplikacionin (shkarko në web) më të dhënat bazike të subjektit aplikues dhe duhet të dorëzoj dokumentacionin sipas UA (MTI) 01/2018 dhe kërkesave shtesë, si në vijim:
1.1. Deklaratën nën betim (duhet të jetë e vulosur nënshkruar) (shkarko në web);
1.2. Certifikatën e regjistrimit të biznesit me të gjitha informatat përcjellëse sipas kërkesave të legjislacionit në fuqi në Republikën e Kosovës;
1.3. Certifikatën e numrit fiskale (nuk aplikohet për bizneset të cilat numrin e regjistrimit të biznesit dhe numrin fiskal e kanë në një certifikatë);
1.4. Vërtetim tatimor me të cilën vërtetohet se aplikuesi nuk ka borxhe aktuale tatimore të pashlyera apo obligime tjera tatimore ose është në marrëveshje për shlyerjen e borxhit me ATK;
1.5. Kopjen e letërnjoftimit të personit/ve në emër të cilit/ve është i regjistruar aplikuesi;
1.6. Dëshmi nga aplikuesi se nuk është nën falimentim ose nën administrim të dhunshëm gjyqësor të lëshuar nga Gjykata Themelore – kërkohet origjinali jo më i vjetër se 30 ditë;
1.7. Dëshminë e xhirollogarisë aktive të aplikuesit në njërën prej bankave të licencuara nga Banka Qendrore e Kosovë;
1.8. Gjendjen e xhirollogarisë bankare të aplikuesit për vitin e fundit. Për aplikuesin e sapo themeluar kjo nuk është e aplikueshme;
1.9. Projekt-propozimin që përfshin: qëllimin, aktivitetet e projektit, koston financiare si dhe planin kohor të realizimit të projektit dhe strukturën organizative të aplikuesit;
1.10. Të mos ketë pranuar mjete nga burimet tjera të financimit për të njëjtat aktivitet, (e dëshmuar më deklaratën nën betim);
1.11. Të kenë kryer të gjitha detyrimet nga mbështetja financiare paraprake, nëse kanë përfituar nga burimet publike të financimit nga MTI për dy vitet e fundit, (e dëshmuar me deklaratën nën betim);
1.12. Lista e të punësuarve aktual (jo me e vjetër se 30 ditë nga shpallja publike) e dëshmuar nga Administrata Tatimore e Kosovës. Në bazë të së cilës listë do të kategorizohen si ndërmarrje mikro, e vogël dhe e mesme. Sqarim: Ndërmarrjet që kanë mbi 249 punëtor, diskualifikohen.
Sqarim: Ju lutem vini re se në mungesë të cilitdo dokument të kërkuar me lartë, subjektet aplikues do të diskualifikohet dhe nuk do të shqyrtohet tutje për kriteret e vlerësimit të listuara më poshtë.
2. Kriteret e vlerësimit:
2.1 Të ardhurat bruto, marrin maksimum 20 pikë:
– ndërmarrjet mikro marrin nga një (1) pikë për çdo 2,000.00 EUR të ardhura bruto,
– ndërmarrjet e vogla marrin nga një (1) pikë për çdo 20,000.00 EUR të ardhura bruto,
– ndërmarrjet e mesme marrin nga një (1) pikë për çdo 100,000.00 EUR të ardhura bruto.
Të ardhurat bruto të dëshmohen nga Administrata Tatimore e Kosovës prej janar 2020 e deri me rastin e aplikimit në këtë thirrje publike.
2.2 Vlera e bashkëfinancimit të projektit investiv nga ana e ndërmarrjes, marrin maksimum 25 pikë:
– ndërmarrjet mikro marrin nga tri (3) pikë për çdo 500.00 EUR të deklarimit të bashkë investimit të vlerës së projektit.
– ndërmarrjet e vogla marrin nga një (1) pikë për çdo 800.00 EUR të deklarimit të bashkë investimit të vlerës së projektit.
– ndërmarrjet e mesme marrin nga një (1) pikë për çdo 1,000.00 EUR të deklarimit të bashkë investimit të vlerës së projektit.
Vlera e bashkëfinancimit të vlerës së projektit investiv duhet të dëshmohet me dëshmi bankare (gjendja bankare e nënshkruar dhe e vulosur) apo me “letër referencë” nga banka (nënshkruar dhe vulosur), e cila dëshmon që do të bashkë financoj projektin e subjektit aplikues në rast që do të përfitoj subvencionimin në fjalë.
2.3 Planifikimi i punësimit, maksimum 30 pikë,
– ndërmarrjet mikro marrin nga tetë (8) pikë për çdo një (1) që do të punësojë;
– ndërmarrjet e vogla marrin nga pesë (5) pikë për çdo një (1) që do të punësojë;
– ndërmarrjet e mesme marrin nga tre (3) pikë për çdo një (1) që do të punësojë;
Numri që planifikohet të punësohet duhet të dëshmohet me deklaratë me shkrim (nënshkruar dhe vulosur), e cila më pastaj për ndërmarrjet përfituese do të jetë pjesë e marrëveshjes.
2.4 Maksimumi 25 pikë, me projekt-propozime dëshmojnë që subvencionet e ndara do të ndikojnë në:
– Rritjen e investimeve në Republikën e Kosovës;
– Rritjen e prodhimtarisë vendore;
– Rritjen e eksportit;
– Promovimin e turizmit;
– Zhvillimin e NMVM-ve;
– Rritjen e kapaciteteve konkurruese të NMVM-ve;
– Hapjen e vendeve të reja të punës.
Vëmendje:
Në rast që ndërmarrja do të jetë përfitues, atëherë do të nënshkruhet marrëveshje dypalëshe (MTI/KIESA dhe ndërmarrje), pjesë e secilës do të jenë edhe deklarimet që janë bërë me rastin e aplikimit.
TVSH është shpenzim i pranueshëm vetëm për persona fizik dhe ndërmarrje jo deklaruese të TVSH-së. Për ndërmarrjet që janë deklaruese të TVSH-së, ky është shpenzim i papranueshëm.
Ndërmarrjet mund të përfitojnë vetëm një grant.
Vlerësimi i aplikacioneve zhvillohet ndërmjet kategorive përkatëse si mikro me mikro, të vogla me të vogla dhe të mesmet me të mesme.
Përfitues do të jenë ato ndërmarrjet që janë renditur më pikë më të larta nga komisioni vlerësues, varësisht prej limiteve buxhetore të planifikuara.
Pronësia e ndërmarrjeve duhet të jetë e definuar para hapjes se kësaj thirrje publike dhe nuk pranohen ndryshim-plotësime në pronësi pas hapjes se kësaj thirrje publike.
Periudha e aplikimit:
Njoftimi për thirrje publike është i publikuar në ueb faqen e Ministrisë së Tregtisë dhe Industrisë mti.rks-gov.net dhe KIESA-s kiesa.rks-gov.net . Subjektet që dëshirojnë të aplikojnë sipas thirrjes publike duhet të shprehin interesimin e tyre duke dorëzuar të gjithë dokumentacionin në zyrën e arkivit të Ministrisë në formë fizike dhe në CD, në Ministrinë e Tregtisë dhe Industrisë, Rr. Muharrem Fejza, Lagjja e Spitalit, p. n. Prishtinë, 10000, Republika e Kosovës.
Afati i fundit për shprehje të interesit është deri më datë 02.10.2020 në orën 16:00 dhe aplikimet pas këtij orari nuk pranohen nga zyra e Arkivit të Ministrisë.
Informata dhe sqarime shtesë mund të merren përmes postës elektronike në: sme.kiesa@rks-gov.net konform U.A.01/2018, por jo më vonë se pesë (5) ditë para mbylljes se thirrjes publike.
