Presidenti i Republikës së Kosovës, Hashim Thaçi, sot ka pritur në takim Kryeministrin e Republikës së Kosovës, Avdullah Hoti, me të cilin ka diskutuar për koordinimin ndërinstitucional në kuadër të luftës kundër pandemisë, për procesin e dialogut mes Kosovës dhe Serbisë, si dhe për çështje të tjera që ndërlidhen me zhvillimin ekonomik, reformat dhe pakon ekonomike.
Presidenti Thaçi ka thënë se për vendin dhe për shoqërinë është jashtëzakonisht me rëndësi që bashkëpunimi ndërinstitucional të jetë efektiv.
“Diskutuam si ta tejkalojmë sa më mirë, sa më lehtë dhe sa më shpejtë pandeminë, që të respektohen të gjitha rekomandimet e ekspertëve dhe të Institutit Kombëtar të Shëndetësisë. Dhe në këtë drejtim duhet të punojmë të gjithë së bashku, por para së gjithash të kemi një respektim të plotë prej të gjithëve, pa dallim, të masave që rekomandohen prej institutit”, ka thënë presidenti Thaçi.
