Kryetarja e Kuvendit të Kosovës, dr. Vjosa Osmani në Ditën Kombëtare të të Pagjeturve, ka vendosur kurora me lule në memorialin që ndodhet në oborrin e Kuvendit të Kosovës.
Kryetarja Osmani ka thënë se tash e 21 vjet, qytetarët e Republikës së Kosovës jetojnë me dhimbjen për më të dashurit tanë, të cilët fati mizor i luftës i ndau padrejtësisht nga ne.
“Tash e 21 vjet shumë familje vazhdojnë të jetojnë me kujtimin për ta në një dhimbje të përhershme; ato zgjohen me shpresën për një lajm, me lutjen për ta kuptuar të vërtetën dhe për t’i pasur afër të dashurit, ose varrin e tyre.
Por, përtej shpresës së tyre, ne duhet të kuptojmë se kjo është një e drejtë elementare e tyre. Ata kanë të drejtë të dinë për fatin e më të dashurve të tyre dhe ne duhet t’ua sigurojmë këtë të drejtë”, ka thënë Osmani.
Sipas kryetares së Kuvendit, çështja e personave të zhdukur nuk është vetëm çështje e fatit njerëzor.
“Ajo, për më tepër, është çështje e të drejtave të njeriut. Mbajtja peng e fatit të tyre është dhunim i të drejtave të njeriut, jo vetëm ndaj viktimave, por edhe ndaj familjeve të tyre e ndaj vendit tonë. Familjet kanë të drejtë të dinë për fatin e tyre. Prandaj, ne sot u bëjmë thirrje institucioneve të vendit, mekanizamave ndërkombëtarë, që ta trajtojnë me seriozitet dhe ta cilësojnë prioritare zbardhjen e fatit të të pagjeturve. Ne nuk mund ta heshtim krimin ndaj njerëzimit e as ta amnistojmë atë. Serbia është përgjegjëse për fatin e tyre, ndaj kjo çështje duhet adresuar sa më parë për ta përmbyllur këtë kapitull të dhimbshëm për familjet që po presin”, ka thënë Osmani.
Çështja e të pagjeturve, sipas zonjës Osmani nuk është vetëm plagë e familjeve të të zhdukurve.
“Ajo është plaga e hapur e shoqërisë sonë. Ne duhet ta trajtojmë atë, duke ngulmuar që fati i personave të pagjetur të zbardhet. Asnjë marrëveshje politike nuk mund të arrihet dhe nuk do të jetë e plotë nëse nuk ka krijuar drejtim të qartë për zbardhjen e fatit të të dashurve tanë”, ka përfunduar Osmani.
