Golashënuesi më i mirë në historinë e kombëtares spanjolle, David Villa, ka vendosur të fillojë një aventurë të re. Pas shkëlqimit që e pati për disa vjet në Evropë, pastaj në SHBA, ai do ta sprovojë veten edhe në kontinentin aziatik, konkretisht te skuadra japoneze Vissel Kobe. Villa aty do ta gjejë ish-bashkëlojtarin e tij te Spanja dhe Barcelona, Andres Iniesta.
Transferimin në Japoni e ka konfirmuar vetë Villa. Përmes një videoje në rrjetet sociale, ai tregon punën e suksesshme të bërë te New York City FC, përpara se të merrte telefonatën që e detyroi atë të zhvendosej në Japoni. “Përshëndetje Japoni, përshëndetje Vissel Kobe”, thotë ai në klip, aty ku shfaqet teksa mban veshur fanellën e klubit nga “J-League”. Sulmuesi 36-vjeçar është i fundit nga yjet e futbollit që janë ende aktivë që kalon në futbollin japonez. Përveç Iniestas, ai do të luajë edhe me gjermanin Lukas Podolski.
