Nën udhëheqjen e ruses Natalia Osipova, e cila e ka përgatitur koreografinë, skenografinë dhe kostumet e shfaqjes “Carmen”, Baleti Kombëtar i Kosovës do tw prezantoj shfaqjen “Carmen”.
Shfaqja “Carmen”, ishte prezantuar për herë të parë para publikut në prill të këtij viti. Por, që nuk është bashkëpunimi i parë i koreografes Osipova me balerinët kosovarë. Pas shfaqjes “Vajza e braktisur”, të cilën e realizuan bashkë vitin e kaluar, Osipova pranoi ftesën e Baletit Kombëtar të Kosovës për një bashkëpunim të dytë.
Me këtë shfaqje ajo ka synuar të kapërcejë vijat klasike të baletit të famshëm “Carmen” dhe përveç temës së dashurisë që e gjejmë te kjo shfaqje, ajo ka ndërfutur edhe temën e lirisë, të cilën thotë se e ka bazuar edhe në historinë e popullit të Kosovës, shkruan OxygenPress.
