Kryeministri në detyrë i Republikës së Kosovës, Albin Kurti ka vazhduar vizitat nëpër komuna. Sot, ai bashkë me ministren në detyrë të Administratës dhe Pushtetit Lokal, znj. Emilija Redžepi, kanë takuar Kryetarin e Komunës së Therandës, z. Bali Muharremajn dhe Kryetarin e Komunës së Shtimes, z. Naim Ismajlin në komunat e tyre respektive.
Në Therandë, kryetari Muharremaj njoftoi se gjendja është duke u menaxhuar suksesshëm dhe se të prekurit me virusin corona janë duke u monitoruar në vazhdimësi. Sa i përket masave të reja të lëvizjes, ato po respektohen dhe po tregohen shumë efektive.
Në anën tjetër, kryetari i Komunës së Shtimes, z. Ismajli tregoi se në komunën e tij deri tani ka qenë vetëm një rast i prekur me COVID-19, i cili është shëruar. Masat e qeverisë dhe rekomandimet e profesionistëve të shëndetësisë për mbajtjen e distancës, pastërtisë dhe më të rëndësishmen qëndrimit në shtëpi janë arsyet e menaxhimit të mirë të kësaj situate në këtë komunë.
