Kancelarja gjermane Angela Merkel ka bërë të ditur se Gjermania do të jepte tre milionë doza vaksinash Covid-19, për vendet e Ballkanit Perëndimor.
Në videokonferencën e realizuar një ditë më parë në kuadër të Samitit të Berlinit, ajo u shpreh se një gjë e tillë do të ndodhte ”sa më shpejtë të jetë e mundur”, përcjell klankosova.tv.
Tutje në adresimin e saj në konferencë Kancelarja gjermane Angela Merkel ka thënë se ajo i sheh për arsye strategjike anëtare të ardhshme të Bashkimit Europian, gjashtë shtetet e Ballkanit Perëndimor.
“Është në interesin e vetë Bashkimit Europian të çojë procesin përpara këtu”, u tha Merkel gazetarëve pas një konference virtuale të Ballkanit Perëndimor, duke lënë të kuptohet për ndikimin e Rusisë dhe Kinës në rajon, por pa i përmendur ata.
Ajo tha se bashkëpunimi më i fortë rajonal i promovuar që nga viti 2014 tashmë kishte arritur suksese fillestare, të tilla si një marrëveshje roaming që sapo kishte hyrë në fuqi.