Prokuroria Themelore në Prishtinë bashkë me Policinë e Kosovës e kanë konfirmuar arrestimin e kryetarit të Komisionit të Pavarur të Mediave, Luan Latifi për veprat penale “marrja e ryshfetit” dhe “keqpërdorim i pozitës apo autoritetit zyrtar”.
Në njoftimin e dërguar thuhet se pas pranimit të informatës për keqpërdorime dhe marrje të ryshfetit nga zyrtarë të KPM-së dhe ndërmarrjes së veprimeve hetimore të nevojshme në konsultim me prokurorin e shtetit, është ftuar për intervistim i dyshuari L.L., kryeshef në KPM.
“Personi me inicialet L.L., është intervistuar në cilësinë e personit të dyshuar në prezencën e avokatit mbrojtës dhe pas argumentimit të ndërlidhjes, është vlerësuar dyshimi i bazuar se, si person me përgjegjësi ekzekutive në KPM, ka qenë në dijeni të qartë për kushtëzimet”.
