Komuna e Budvës së Malit të Zi dhe kompania “Sunraf beach properties” është paditur nga Ministra e Drejtësisë së Kosovës e cila kërkon kthimin e rreth 4 mijë e 500 metrave katrorë tokë në shëtitoren “Rafailoviq”, ku ishte dikur vendpushimorja për fëmijë.
Kosova pretendon se ka blerë këtë vendpushim gjashtë dekada më parë dhe kërkon nga Gjykata e Kotorrit, ku është ngritur procesi gjyqësor, që të miratojë një masë të përkohshme që ndalon asgjësimin dhe tjetërsimin e vendit deri në përfundim të kontestit gjyqësor, njofton Klankosova.tv.
Republika e Kosovës nga Gjykata e Kotorrit ka pranuar aktvendimin për dhënien e përgjigjes në padi bëhet e ditur nga Ministra e Drejtësisë për Klankosova.tv.
“Republika e Kosovës e ka pranuar aktvendimin me NR.350/18 nga Gjykata Themelore në Kotorr për dhënien e përgjigjes në padi. Në çështjen juridike të vërtetimit të pronësisë, sipas paditësit dhe të paditurve”.
Ministria e Drejtësisë në përgjigjen për Klankosova.tv bën të ditur se procedurat për këtë padi kanë nisur që nga viti 2018.
“Me datë 17.07.2018 Avokatura Shtetërore, ka ushtruar përgjigjeje në padi, ku edhe gjatë viteve 2019-2021 AVSH-ja ka përcjell parashtresa me të cilën jemi deklaruar, lidhur me çështjen gjyqësore”.
“Me datë 04.11.2020, AVSH-ja deponon në gjykatë padinë për vërtetimin e të drejtës së pronësisë me propozim për caktimin e masës së sigurisë si dhe përfaqësime gjyqësore. Tani kjo procedurë gjyqësore është duke vazhduar”.
“Me datën 04.11.2020 AVSH-ja deponon padinë në Gjykatën Themelore në Kotorr ku kërkon vërtetimin e pronësisë, masën e sigurisë dhe lirimin e pronës”.
“Bazuar në ligjet në fuqi të Malit të Zi pritet që gjykata të thirre seancë gjyqësore për të vendosur për masën e sigurisë si hap i parë procedural”, thuhet në përgjigjen e MD-së.
Tutje MD-ja bën të ditur se AVSH-ja nuk ka ndonjë kërkesë tjetër nga institucionet që i përfaqëson për inicimin e ndonjë padie të ngjashme si kjo ndaj Malit të Zi.
Mirëpo, Ministria e Drejtësisë për të vërtetuar se kjo pronë është blerë nga Kosovë duhet të sigurojë kontratat nga arkiva shtetërore e Malit të Zi.
“Për të dokumentuar blerjen e atij vendpushimi gjashtë dekada më parë është angazhuar AVSH-ja e cila në bazë të akteve noteriale që kanë dorëzuar palët në procedurë në rastin ku jemi të paditur e më pastaj duke siguruar kontratat nga arkiva shtetërore e Malit të Zi që nga vitet 60-ta”.
