Kryeministër në detyrë, zonja dhe zotërinj, është kënaqësi që jam këtu dhe dëshiroj të falënderoj qeverinë e Kosovës, komunën e Prishtinës dhe Odën ekonomike amerikane të Kosovës për mundësimin e këtij çasti frymëzues. Alisoni dhe unë jemi tepër të nderuar që jemi dëshmitarë të vënies së gurthemelit dhe e di se senatori Bob Doll është prekur thellë nga ky nderim.
Gjatë tërë jetës së tij në shërbim – si hero i ushtrisë amerikane gjatë Luftës së Dytë Botërore, në Kongresin e SHBA-së, si kandidat për president të SHBA-së dhe tani si njëri ndër burrështetasit më të respektuar – Bob Doll ka qenë prijës për promovimin e kauzës së lirisë nëpër tërë botën. Prandaj nuk ishte fare befasi që ai u bë mbështetës i pazevëndësueshëm i Kosovës – duke qëndruar përkrah popullit të këtij vendi në përpjekjet tuaja për ta ndërtuar një shtet të fortë dhe të lirë.
Qeveritë tona nuk do të pajtohen gjithmonë rreth politikave dhe do të duhet punë e mundimshme për ti mbajtur në vijë të njëjtë pozicionet tona përderisa partneriteti i Kosovës me SHBA-në piqet. Por, e kemi parë se miqësia e qëndrueshme ndërmjet popullit të Amerikës dhe atij të Kosovës nuk varet nga ndonjë parti e posaçme politike apo udhëheqës individual.
