Ministrja e Financave të Kosovës, Hykmete Bajrami, në një konferencë urgjente për mediat ka dhënë detaje për zhdukjen e 2 milion eurove nga thesari i shtetit.
Bajrami ka deklaruar se janë bërë 4 transaksione të jashtëligjshme nga Thesari i Republikës së Kosovës dhe se mbi 2 milionë euro janë dërguar në llogarinë e një operatori ekonomik.
“Sot s’është lajmi i mirë, e keni parë në gazetë. Bëhet fjalë për 4 trasnsaksione të dyshimta, që kanë ndodhur nga llogaria e thesarit që është në kuadër të MF-së. 2 milionë euro kanë shkuar në llogari të një operatori ekononik”, ka thënë Bajrami në konferencë për media.
“Me të kuptuar kemi raportuar rastin, dhe krimet ekonomike po merren me hetim të brendshëm”, ka thënë Bajrami më tej.
Ministrja ka thënë se tashmë po interesohen të gjejnë se kush është përfituesi përfundimtar i të hollave.
Në konferencën e mbajtur për media, ajo tha se i arrestuari është zyrtar i Thesarit të Shtetit, ndërsa tjetri është eprori i tij në vijë raportuese.
“Deri më tani janë suspenduar 2 zyrtarë, njëri nga ta është arrestuar nga Policia e Kosovës. Ne tani më kemi gjurmuar, ky është transaksion bankar. Institucionet e rendit janë duke u marrë, duke parë se kush janë përfituesit fundor”, ka theksuar ajo.
“Janë zyrtarë të Thesarit të Shtetit, punon në thesar qe 11 vite ndërsa tjetri është eprori i tij në vijë raportuese. Gjithë ata që punojnë aty e kanë qasjen pasi duhet të kryejnë transaksione në baza ditore”, shtoi Bajrami.
