Ka filluar një peticion për ndalimin degradimit të mëtutjeshëm të ambientit nga Mini Hidrocentralet dhe Hidrocentralet e vogla.
Në një njoftim për media të Fondacionit të Kosovës për Shoqëri të Hapur (KFOS) bëhet me dije se të martën, më 29 tetor fillon nënshkrimi i peticionit, nëpërmjet të cilit qytetarët e Kosovës i kërkojnë institucioneve më të larta të vendit, që të ndalin degradimin e mëtutjeshëm të ambientit nga Mini Hidrocentralet dhe Hidrocentralet e vogla.
“Shkatërrimi i vazhdueshëm i resurseve tona natyrore nga të gjithë ata që abuzojnë dhe shfrytëzojnë resurset e vendit për përfitime individuale, qofshin vendim-marrës apo investitorë, na shtynë të protestojmë dhe të premtojmë se nuk do të ndalemi. Argumentet e mbledhura dëshmojnë se nëse nuk veprojmë TASH dhe menjëherë, lumenjtë e Kosovës, si dhe popullata që jeton në afërsi të tyre, do të shkatërrohen dhe degradohen në pakthim”, thuhet në njoftimin për media të KFOS-it.
Sot po ndërtohen hidrocentrale të vogla, në hapësirat e parqeve kombëtare, dhe zonat e mbrojtura me ligj, ku është rreptësishtë e ndaluar; pa dokumentacion të kompletuar ligjor dhe pa u konsultuar të gjitha palët e interesit; që shkatërrojnë florën dhe faunën, devijojnë lumenjtë, reduktojnë dhe rrezikojnë furnizimin e popullatës me ujë, e shumë të tjera.
Peticioni nis zyrtarisht në orën 12:00 në sheshin Skënderbeu. Mbledhja e nënshkrimeve do të zgjasë dy (2) javë dhe do të bëhet në shtatë komunat e mëdha të Kosovës përfshi edhe komunat përreth.
Organizatat partenere në komunat e poshtëshënuara do të kenë pika të vendosjes për mbledhje të nënshkrimeve:
1. Instituti Demokratik i Kosovës – Prishtinë
2. EC Ma Ndryshe – Prizren
3. Iniciativa për Progres INPO – Ferizaj – Gjilan – Shtërpce
4. REC Kosova – Mitrovicë
5. ERA Group – Pejë
6. KADC – Gjakovë
7. Organizata për Mbrojtjen e Mjedisit – GJETHI – Kaçanik – Hani i Elezit
8. Aktiv – Veri të Mitrovicës
