SHBA-ja në të nxehtit ekstrem

Fillimi i fundjavës ka qenë përvëlues për pjesën më të madhe të SHBA-së, e cila po përballet me një valë të nxehtit ekstrem që përfshin 150 milionë banorë, ku deri më tani janë shënuar tre viktima. Temperaturat arritën 38 gradë Celsius në Nju Jork dhe Uashington.

Kjo valë e të nxehtit nuk do të kursejë as rajonet në Mid-West, sipas Shërbimit Meteorologjik kombëtar amerikan. Temperaturat ekstreme priten të zgjasin të paktën deri të dielën në mbrëmje.

Dy të vdekur u regjistruan në Shtetin e Maryland-it (lindje), në afërsi të Uashingtonit në fund të javës ndërsa i nxehti nuk kishte arritur ende vlerat maksimale.

Sinoptikanët shprehen se në Uashington, termometri pritet të shënojë 43.3 gradë Celsius. Sipas tyre, per një kohë të shkurtër, atje do të ndihet po aq nxehtë sa dhe në Luginën e Vdekjes në Kaliforni, një nga vendet më të nxehta në botë.

Paralajmërimet janë për një valë të nxehti “të shkurtër por në nivele ekstreme”, ndërsa banorët janë këshilluar të konsumojnë sa më shumë ujë e të shmangin aktivitet e forta fizike.

Temperaturat mund të arrijnë deri në 45 gradë Celsius në zona të caktuara, paralajmëroi agjencia qeveritare, e cila publikon mesazhe për të shmangur qëndrimin jashtë në oraret e drekës./atsh