Gjykimi ndaj ish-komandantit të Ushtrisë Çlirimtare të Kosovës (UÇK), Remzi Shala, që po zhvillohet në Gjykatën Themelore në Prizren-Departamenti për Krime të Renda, është shtyrë me kërkesën e mbrojtësit, avokatit Afrim Paqarizi, nën arsyetimin se i duhet kohë për përgatitjen e mbrojtjes pasi që i njejti një ditë më parë i ka pranuar shkresat e lëndës, raporton Drejtësia Sot.
I pandehuri Shala po akuzohet nga Prokuroria Speciale e Republikës së Kosovës, për privim nga liria të një civili në kohë lufte, ashtu që duke vepruar si pjesëtar i Ushtrisë Çlirimtare të Kosovës (UÇK), e kanë marrë nga shtëpia e tij, viktimën Haxhi Përteshin, dhe të njëjtin e kanë dërguar në një vend të panjohur, në drejtim të fshatit Grajqevc, dhe pas disa dite trupi i pajetë i ndjerit ishte gjetur në afërsi të rrugës në fshatin Duhël.
Në seancën e sotme, prokurori Haki Gecaj, dhe avokati i palës së dëmtuar, Asdren Hoxha, nuk patën kundërshtime lidhur me propozimin e avokatit Paqarizi që ky shqyrtim gjyqësor të shtyhet për një datë tjetër, nën arsyetimin se kjo lëndë është voluminoze.
