Qytetarë të Kosovës kanë protestuar sot për pasigurinë në vendin e punës. Në protestën e thirrur nga organizata joqeveritare “Beyond the Wall”, ata janë mbledhur në sheshin “Zahir Pajaziti” dhe me 93 helmeta në duar, kanë marshuar tek ndërtesa e Qeverisë së Kosovës.
Rrethojat e Qeverisë së Kosovës u mbushën me 93 helmeta, për secilin person që ka humbur jetën në vendin e punës.
Organizatorët e protestës bënë të ditur se për secilin rast që zbardhet, një helmetë do të largohet nga aty, ndërsa për çdo rast të ri do të shtohet një e tillë në rrethojat e ndërtesës së Qeverisë.
Moto e protestës së sotme ishte “Ndërtesat janë tuajat, jeta është e jona”.
Kushtrim Mehmeti, organizator i protestës tha se nëse dikush i largon këto helmeta pa lejen e tyre, do të konsiderohet bashkëfajtor për rastet e vdekjeve në vendin e punës.
“Këto 93 helmeta do të shtohen në qoftë se ka numër tjetër të vdekjeve në vendin e punës, për secilën vdekje të re do të shtohet një helmetë me një numër të ri, e për secilin rast zbardhet do të hiqet një helmetë. Nëse qeveria ose dikush tjetër vendos t`i largojë këto helmeta pa lejen tonë atëherë ata llogariten bashkë kriminelë, bashkë fajtorë me përgjegjësit për rastet e vdekjeve në vendin e punës. Protesta jonë është diçka që me ngritë një vetëdije dhe me u rrit një bashkëpunim qytetarë që me pa se momentalisht gjendja e punëtorëve është gjendje e mjerueshme”, deklaroi Kushtrim Mehmeti, organizator i protestës.
Pjesë e protestës ishte edhe Kryetari i Sindikatës së Pavarur të Sektorit Privat, Jusuf Azemi.
Ai tha se Qeveria e Kosovës nuk është interesuar të merret me zvogëlimin e rasteve për punëtorët që vdesin në vendin e punës.
“Numri i cili është për nëntë muaj 18 raste është numër rekord pas luftës dhe për këtë e them me bindje të plotë i kemi ofruar modalitetet që të dalim dhe ti inspektojmë kompanitë që t`i edukojmë edhe pronarët e kompanive por ti edukojmë edhe punëtorët megjithatë shteti nuk e ka treguar as interesimin më të vogël dhe jemi këtu ku jemi. Po të vdesin brenda 9 muajsh 18 punëtorë, dikush duhet të jap përgjegjësi”, tha Jusuf Azemi.
Organizatorët bënë të ditur se nëse nuk ndërmerren masa, do të vazhdojnë edhe me aksione të tjera.OxygenPress.info