Pandemia e COVID-19 nënvizon nevojën urgjente për forcimin e fuqisë globale punëtore të shëndetësisë. Raport i ri Gjendja e infermierisë në botë 2020, i botuar me rastin e Ditës Botërore të Shëndetit, ofron një vështrim të thelluar në komponentin më të madh të fuqisë punëtore të shëndetësisë.
Gjetjet identifikojnë hendekë të rëndësishëm në fuqinë punëtore të infermierisë, si dhe fushat prioritare për investime të targetuara në arsimin e infermierisë, vendet e punës dhe udhëheqjen për forcimin e infermierisë në mbarë botën dhe për përmirësimin e shëndetit për të gjithë.
Infermierët përbëjnë më shumë se gjysmën e të gjithë punëtorëve shëndetësorë në botë, duke ofruar shërbime jetike në të gjithë sistemin shëndetësor. Në rajonin evropian të OBSH-së, 57% e fuqisë punëtore të shëndetësisë përbëhet nga infermierë.
Sot, ashtu si kurdoherë, infermierët janë në pararojë të luftës kundër epidemive dhe pandemive që kërcënojnë shëndetin. Infermierëte rajonit po i përgjigjen pandemisë COVID-19 me guxim: kurrë më parë nuk është demonstruar më qartë vlera e tyre.
“Lufta jonë kundër COVID-19 ka treguar edhe njëherë se sa themelor është profesioni i infermierisë për shoqërinë dhe për të gjithë ne. Në përballjen me rrethanat më të jashtëzakonshme dhe kushtet më të rënda të punës, infermierët në mbarë rajonin evropian dhe në botë, i janë përgjigjur sfidës me trimëri, dhembshuri dhe profesionalizëm. Ata, së bashku me të gjithë punëtorët e kujdesit shëndetësor, meritojnë falënderimet dhe respektin më të thellë,” tha Dr. HansHenri P. Kluge, Drejtori Rajonal i OBSH-së për Evropën.
“Është koha t’i japim profesionit të infermierisë vlerësimin që meriton. Sot, kur shënojmë Ditën Botërore të Shëndetit, por edhe në të ardhmen, vendet duhet të investojnë në infermierë dhe t’i mbështesin që të punojnë në masën e plotë të trajnimit dhe fushëveprimit të praktikës së tyre. Duke vepruar kështu, fuqia jonë punëtore e infermierëve të aftë dhe të përkushtuar do ta ketë forcën dhe burimet për të ndërtuar një Evropë më të shëndetshme,” përfundoi ai.
Mungesa globale e infermierëve
Raporti Gjendja e infermierisë në botë 2020, i zhvilluar nga OBSH në partneritet me Këshillin Ndërkombëtar të Infermierëve (ICN) dhe Infermieria Tash, tregon se sot në botë ka pak më pak se 28 milionë motra infermierë në mbarë botën.
Në Rajonin e Evropës janë 7.3 milionë infermierë, ose rreth 79 infermierë për 10,000 persona. Edhepse, kjo shifër është rreth dyfishi i mesatares globale, ekspertët thonë se për shkak të strukturës moshore të fuqisë punëtore të infermierisë në Rajon dhe varësisë në rekrutimin ndërkombëtar të infermierëve në disa vende me të ardhura të larta, nuk ka vend për vetëkënaqësi.
Rreth 90% e të gjithë infermierëve janë femra, por vetëm 25% e pozitave udhëheqëse mbahen prej tyre. Kjo thekson nevojën për politika që rrisin dhe forcojnë udhëheqjen e infermierisë dhe inkurajojnë pjesëmarrjen e grave në nivele drejtimi.
Kur vendet u mundësojnë infermierëve të marrin rol udhëheqës, për shembull, duke pasur një krye zyrtar/e qeveritar/e të infermierisë (ose pozitë ekuivalente) dhe programe të udhëheqjes së infermierisë, rregullimi i arsimit të infermierisë dhe kushteve të punës përmirësohet.
“Infermierët janë çelësi për t’iu përgjigjur shumë problemeve tona shëndetësore. Nëse duam të kemi shërbime të forta shëndetësore, duhet të investojmë në motra infermierë, t’i edukojmë dhe trajnojmë sipas standardeve ndërkombëtare dhe në nivel universitar dhe t’u sigurojmë pajisje dhe burime të përshtatshme. Infermierët duhet të marrin pagë të drejtë për punën e tyre dhe të jenë në gjendje të vazhdojnë të zhvillohen profesionalisht. Kjo do të ndihmojë në përmirësimin e rezultateve shëndetësore, përmirësimin e cilësisë së kujdesit dhe avancimin e mbulimit shëndetësor universal,” tha Dr Sergy Koryak, Udhëheqës i Zyrës së OBSh-së në Prishtinë.
Dhjetë rekomandime për një fuqi punëtore të infermierisë të lartë
Për t’i siguruar botës fuqinë punëtore të infermierisë që i nevojitet, OBSh-ja dhe partnerët e saj rekomandojnë që të gjitha vendet:
1. të rrisin financimin për arsimimin dhe punësimin e më shumë infermierëve;
2. të forcojnë kapacitetet për mbledhjen, analizimin dhe ndërmarrjen e veprimeve sipas të dhënave në lidhje me fuqinë punëtore të shëndetësisë;
3. të monitorojnë lëvizshmërinë dhe migracionin e infermierëve dhe ta menaxhojnë me përgjegjësi dhe etikë;
4. të arsimohen dhe trajnohen infermierët në shkathtësitë shkencore, teknologjike dhe sociologjike që u duhen për të nxitur përparimin në kujdesin parësor shëndetësor;
5. të krijohen pozita udhëheqëse, përfshirë një krye zyrtar/e qeveritar/e të infermierisë, dhe të mbështetet zhvillimi i udhëheqësisë mes infermierëve të rinj;
6. të sigurohet që motrat infermierët në ekipet e kujdesit parësor shëndetësor të punojnë me potencialin e tyre të plotë, për shembull, në parandalimin dhe menaxhimin e sëmundjeve jo infektive;
7. të përmirësohen kushtet e punës, duke përfshirë edhe nivelet e sigurta të personelit, pagat e drejta dhe respektimin e të drejtave për shëndetin dhe sigurinë në punë;
8. të zbatohen politika të fuqisë punëtore të infermierisë të ndjeshme ndaj gjinisë;
9. të modernizohet rregullimi profesional të infermierisë duke harmonizuar standardet e arsimit dhe praktikës, si dhe duke përdorur sisteme që mund t’i njohin dhe përpunojnë kredencialet e infermierëve në nivel global; dhe
10. të forcohet roli i infermierëve në ekipet e kujdesit, duke thirrur sektorë të ndryshëm (shëndetësi, arsim, imigrim, financë dhe punë) së bashku me palët e interesit të infermierisë për dialogun e politikave dhe planifikimin e fuqisë punëtore.
Mesazhi i raportit është i qartë: qeveritë duhet të investojnë për ta përshpejtuar arsimimin dhe trajnimin e infermierisë, krijimin e vendeve të punës të infermierisë, dhe fuqizimin e udhëheqjes së motrave infermierëve. Pa motrat infermierët, mamitë dhe punëtorët e tjerë të shëndetësisë, vendet nuk munden ta fitojnë betejën kundër shpërthimeve epidemike, ose të arrijnë mbulim shëndetësor universal dhe Objektivat e Zhvillimit të Qëndrueshëm.
“Infermierët janë boshti i çdo sistemi shëndetësor. Sot, shumë infermierë e gjejnë veten në vijën e parë në betejën kundër COVID-19,” tha Dr. TedrosAdhanomGhebreyesus, Drejtori i Përgjithshëm i OBSh-së. “Ky raport është një përkujtesë e fortë për rolin unik që luajnë infermierët dhe një alarm zgjimi për t’u siguruar që të marrin mbështetjen e nevojshme për ta mbajtur botën e shëndetshme.”
