Kreu i Organizatës Botërore të Shëndetësisë u shpreh kundër lejimit të qëllimshëm të përhapjes së koronavirusit me shpresën e arritjes së të ashtuquajturit imunitet të tufës, duke thënë se ideja është joetike. “Imuniteti i tufës është një koncept i përdorur për vaksinimin, në të cilin një popullatë mund të mbrohet nga një virus i caktuar nëse arrihet vaksinimi,” tha Tedros Adhanom Ghebreyesus gjatë një konferencë virtuale për shtyp.
Shën.red. Imuniteti i tufës, i njohur edhe si imuniteti i komunitetit ose popullsisë, është një formë e mbrojtjes nga sëmundjet infektive që arrihet përmes vaksinimit, ose përmes infektimeve të mëparshme. Sa më imune të jetë popullata, aq më e mbrojtur do të jetë pjesa tjetër e popullsisë, pasi individët imunë kanë më pak gjasa të transmetojnë virusin dhe një gjë e till prish zinxhirët e transmetimit.
“Imuniteti i tufës arrihet duke mbrojtur njerëzit nga një virus, jo duke i ekspozuar ndaj tij,” tha Tedros. “Asnjëherë në historinë e shëndetit publik, imuniteti i tufave nuk është përdorur si një strategji për t’iu përgjigjur shpërthimit të një virusi, e lëre më një pandemie.”
