Departamenti i Krimeve të Rënda në Gjykatën Themelore në Gjilan, ka shpallur aktgjykim dënues ndaj tre të akuzuarve L.I., L.Sh., dhe L.M., për veprën penale “hyrje në sistemet kompjuterike” dhe veprës penale nga neni 13 paragrafi 3 dhe neni 15 paragrafi 1 të Ligjit mbi parandalimin dhe luftimin e krimit kibernetik, raporton Drejtësia Sot.
Lajmi është bërë i ditur nga komunikata për media e dërguar nga kjo gjykatë.
Sipas komunikatës, trupi gjykues të akuzuarin L.I., e ka shpallur fajtor, duke i shqiptuar dënim në kohëzgjatje prej 3 (tre) vite e 6 (gjashtë) muaj burgim dhe gjobë në lartësi prej 5.000 Euro, ndërsa të akuzuarit L.Sh., dhe L.M., i ka gjykuar me nga 3 (tre) vite burgim dhe gjobë në lartësi prej 3.000 Euro, secilin veç e veç.
Gjithashtu të akuzuarve në fjalë, u janë konfiskuar disa llaptopë, kompjuterë, telefona celular, kartela bankare dhe një shumë e të hollave.
Tutje në komunikatë thuhet se trupi gjykues ka refuzuar akuzën ndaj L.I., L.Sh., dhe L.M., për veprën penale “shmangie nga tatimi”, dhe ka liruar nga akuza për veprën penale “falsifikimi i letrave me vlerë dhe instrumentet e pagesës”, pasi që nuk është vërtetuar se kanë kryer këto vepra penale.
Sipas burimeve të Drejtësia Sot, për këtë çështje penale janë sjellur dëshmi nga FBI.
Ndryshe, sipas aktakuzës së Prokurorisë Themelore në Gjilan, i akuzuari L.I., nga viti 2011 deri më 4 gusht 2015, me qëllim të përfitimit të kundërligjshëm të dobisë pasurore dhe me qëllim që t’i shkaktoi dëm personave të tjerë, ka ndërhyrë në mënyrë të paautorizuar në sistemet kompjuterike të shfrytëzuesve të internetit kryesisht në SHBA përmes kompanisë Yahoo, duke kopjuar, vjedhur të dhëna të ndjeshme si të dhënat për llogari bankare dhe këto të dhëna i ka arkivuar në një server të veçantë, ashtu që ka përdorur ëeb faqen e krijuar për shitjen e programeve keqbërëse tek personat e ndryshëm, dhe ka pranuar pagesa nga shtetas të shteteve si Kina, Amerika, Rusia, Ukraina etj., në shumën prej 73.477,18 Euro, në emrin e tij dhe anëtarëve të ngushtë të familjes.
Gjithnjë sipas aktakuzës, të akuzuarit L.Sh., dhe L.M., nga viti 2014 deri në gusht 2015 me qëllim të përfitimit të kundërligjshëm të dobisë pasurore dhe me qëllim që t’i shkaktoi dëm personave të tjerë, kanë ndërhyrë në mënyrë të paautorizuar në sistemet kompjuterike dhe kanë përdorur programe të ndryshme, duke arritur qasje në serverët e shtetasve të huaj dhe nga aty kanë arritur të vjedhin informata të kredit-kartelave dhe më pas këto informata i kanë shfaqur në një ankand online, disa nga këto i kanë tërhequr në Zvicër përmes H.K., ku në pajisjet elektronike të sekuestruara janë gjetur kredenciale – miliona e-mail nga mbarë bota, së bashku me fjalëkalimet, gjë që mundësojnë qasje në këto e-mail pa lejen e pronarit
Palët kanë të drejtën e ankesës ndaj këtij vendimi në Gjykatën e Apelit, thuhet në fund të komunikatës dërguar mediave./Dre
