Yllka Domi u lind më 18 gusht 1982, në Gjakovë. Yllka ishte e bija e Afrim dhe Dashurie Domit. Gjyshi i saj, Kasim Domi ishte një atdhetar dhe veprimtar i madh u dënua nga pushtuesit serbo-jugosllav dhe vuajti dënimin në burgun më famëkeq në Goli Otok. Babai i Yllkës, Afrimi po ashtu u angazhua në aktivitete dhe në institucionet Kosovës për të dhënë kontributin e tij. Për aktivitetin e tij, ai u dënua nga pushtuesit serb dhe vuajti burgun në burgjet serbe.
E ëma e Yllkës Dashuria, i edukoi fëmijët e saj, Triumfin, Visarin dhe Yllkën, dhe i ushqeu me dashuri dhe atdhedashuri, edhe pse në rrethana mjaft të vështira, sepse ishin kohë të egra dhe familja e tyre ishte vazhdimisht në shënjestër të pushtimit serb.
Yllka ishte nxënëse e shkëlqyeshme e shkollës “Mazllom Këpuska“, në Gjakovë, dhe herët u dallua për shkathtësitë e saj organizative, por edhe për talentin e rrallë që kishte për shkrimet dhe krijimtarinë letrare. Pra, shumë herët ajo u mor me shkrime dhe aktrim.
Yllka angazhohej në të gjitha programet dhe manifestimet e shkollës, por ishte e pranishme edhe në organizimet tjera kulturore që mbaheshin në qytet gjatë kohës së okupimit. Ajo lexonte poezitë e saj, por edhe recitonte bukur poezitë e shkrimtarëve të mëdhenj.
Yllka Domi ka botuar shkrimet dhe poezitë e saj në revista të ndryshme. Me këto cilësi, ajo vazhdoi edhe mësimet në Gjimnazin ”Hajdar Dushi“, ku përveç sukseseve në mësime, ajo udhëhoqi edhe grupin letrar.
Yllka rritej në një frymë atdhetare dhe po përballej gjithmonë me padrejtësitë që po i bëheshin kombit shqiptar. Prandaj, ajo ishte e interesuar gjithmonë që të informohej saktë se si po lëviznin gjërat. Kudo ishte aktive, në shkollë, në grupe humanitare, në ndihmë banorëve të zhvendosur dhe aty ku e kërkonte nevoja.
Si e tillë, ra në kontakt me shumë të rinj e të reja, të cilët ishin kyçur në bërthamat e Ushtrisë Çlirimtare të Kosovës. Ka kryer kurset për ndihmë të plagosurve në luftë dhe ka ushtruar përdorimin e armëve dhe pastrimin e tyre. Ajo ishte shumë e shkathtë dhe çdo përpjekje të saj e realizonte me sukses. Ashtu siç edhe kishte dëshirë, ashtu edhe u radhitë, në Brigadën 137 – Gjakova, të Ushtrisë Çlirimtare të Kosovës.
Gjatë ofensivës së Betejës së Çabratit, e cila po zhvillohej në mes të forcave të UÇK-së dhe ushtrisë serbe, më 7 maj të vitit 1999, u vra Yllka bashkë me disa bashkëluftëtarë.
16-vjeçarja Yllka Domi u vra me snajper nga forcat serbe, në Çabrat, në ofensivën e 7 majit 1999.
Ushtria serbe, për të fshehur gjurmët e krimit, trupin e Yllkës bashkë me trupat e tjerë të vrarë, i dërguan në një varrezë masive në Batajnicë të Serbisë.
Pas identifikimit të eshtrave të Yllka Domit nga ekspertët e mjekësisë ligjore, ajo u rivarrosë më 23 dhjetor të vitit 2003, në kodrën e Çabratit, në Gjakovë.