Ndoshta jo të gjithë e dinë se përveç kripës së kuzhinës, të cilën jemi mësuar të përdorim rëndom, ekzistojnë dhe kripëra të tjera që vijnë nga e gjithë bota dhe dallohen nga ngjyra e tyre. Secila ka karakteristika e vlera specifike, si dhe përdorime të caktuara në kuzhinë
Përveç kripës së bardhë klasike që njohim dhe përdorim të gjithë, ekzistojnë dhe lloje të tjera, që jo vetëm u japin më shumë shije recetave, por gjithashtu kanë më tepër vlera ushqyese për organizmin?
Në zonën e Mesdheut, ku bën pjesë dhe Shqipëria, kripa përdoret gjerësisht, jo vetëm në gatim, por gjithashtu për të marinuar ose konservuar ushqimet. Kur nuk kishte pajisje elektroshtëpiake, kripa ishte “frigoriferi” i shtëpisë. Për këtë arsye jemi mësuar prej shekujsh me shijen e saj. Jemi familjarizuar aq shumë me kripën, saqë e kemi të vështirë ta përjashtojmë nga dieta. Por mjekësia këshillon të bëjmë kujdes, pasi konsumi i tepërt i “klorurit të natriumit” favorizon hipertensionin dhe shton rrezikun për t’u prekur nga sëmundjet e zemrës, enëve të gjakut dhe veshkave.
Përdorimi i tepërt i natriumit rrit rrezikun e kancerit të stomakut apo humbjet e kalciumit me anë të urinës, çka favorizon osteoporozën. Shija e karakteristikat biologjike të kripës së zakonshme lidhen ngushtësisht me natriumin, sasia natyrale e të cilit në ushqime është e mjaftueshme për të mbuluar nevojat e organizmit. Për pasojë, shtimi i kripës në dietë nuk është i nevojshëm për të përmbushur kërkesën tone metabolike.
