Kryeministri në detyrë i Republikës së Kosovës, Avdullah Hoti mori pjesë në fillimin e punimeve në zgjerimin e rrugës në hyrje të qytetit të Ferizajt, projekt të cilin e quajti të rëndësishëm jo vetëm për këtë komunë, por për tërë rrjetin infrastrukturor edhe rrugor në nivel vendi.
“Një projekt shumë me rëndësi që krijon qasje të mirë për qytetarët e Ferizajt, me komunat përreth, regjionet përreth. Më vjen shumë mirë që më në fund janë kompletuar të gjitha procedurat e nevojshme për të filluar këtë projekt dhe e falënderoj BERZH-in, dhe kompaninë që ka marrë përsipër ndërtimin e saj, si dhe ambasadorin italian që e kemi prezent në shumë ngjarje të tilla, ku përmes kompanisë italiane po rritet prezenca e kompanive të BE-së përgjithësisht, që është në interes të madh për ne”, tha kryeministri Hoti.
Kryeministri Hoti nënvizoi se, është kompletuar projekti i cili i akomodon plotësisht nevojat e qytetarëve me nënkalimet e nevojshme për lëvizje të lirë për integrim të plotë të të gjitha lagjeve përreth këtij projekti, si dhe janë akomoduar edhe nevojat e bizneseve në mënyrë që ato të mos mbesin të izoluara për qasje në këtë infrastrukturë.
