Kryeministri i Republikës se Kosovës, Avdullah Hoti, i shoqëruar nga Zëvendësministri i Financave, Agim Krasniqi, vizitoi sot Komisionin Rregullativ të Prokurimit Publik (KRPP), ku me anëtarët e bordit të këtij institucioni diskutoi për të arriturat në implementimin e Prokurimit Elektronik, përkatësisht në përmbylljen e fazës së parë – Transparencës në prokurimin publik, si dhe për procesin e fazës së dytë të reformës për prokurim publik.
Kryeministri Hoti tha se ndihet mirë që faza e parë e prokurimit elektronik ka filluar kur ai ka qenë Ministër i Financave, para 5 vjetësh, ndërsa tash është plotësisht funksionale.
“Kjo fushë është tejet e rëndësishme, pasi që brenda vitit janë rreth 630 milionë euro që kalojnë nëpër procedurat e prokurimit, si dhe 12 mijë kontrata që nënshkruhen nga të gjitha autoritetet kontraktuese, ndaj jemi shumë të interesuar ta çojmë përpara avancimin e prokurimit në Kosovë’’ theksoi kryeministri Hoti.
