Steven Gerrard padyshim është njëri nga legjendat e futbollit anglez, e sidomos për tifozët e Liverpoolit. Ka fituar shumë trofe, por edhe ka pasur shumë zhgënjime, mbi të gjitha mungesën e një titulli në Ligën Premiere.
Me rastin e shfaqjes në kinema të dokumentarit “Make us dream”, që bazohet te karriera e ish-mesfushorit të Liverpoolit, ai është kthyer të flasë në një intervistë të dhënë për “Sportsmail” për episodin më fatkeq të karrierës: rënia gjatë ndeshjes në shtëpi kundër Chelseas në vitin 2014, që i hapi rrugën golit të Demba Ba dhe që shoi shpresat e “Të Kuqve” për atë titull që ndiqet prej më shumë se 20 vitesh.
Dokumentari tregon se si ai djalosh nga Liverpuli u bë simboli i një skuadre, një qyteti të tërë. Por, mes shumë dhuratave që i ka bërë tifozëve është edhe një makth. Gerrard, në fakt, ka kujtuar atë moment të tmerrshëm të ndeshjes kundër Chelseas. Një ndeshje që kapiteni nuk duhej ta kishte luajtur për shkak të një problemi në kurriz.
