Komisioneri europian i ngarkuar me task forcën mbi vaksinat antiCOVID-19, Thierry Breton, premtoi 2-3 miliardë doza të prodhuara në Bashkimin Europian deri në fund të vitit 2021, në një intervistë për mikrofonin e radio Europe 1.
Breton siguroi se Bashkimi Europian po punon për të përshpejtuar prodhimin e vaksinave në tokën europiane.
“Nëse gjërat shkojnë mirë dhe ato shkojnë mirë, dy deri në tre miliardë doza vjetore mund të prodhohen deri në fund të vitit”, shtoi komisioneri.
Sipas Breton, BE është e përfshirë në një “luftë” me dy faza për vaksinën.
“Së pari, faza shkencore. Mbi këtë kemi fituar terren, me një vaksinë të prodhuar në 10 muaj. Faza e dytë ka të bëjë me prodhimin. Ne duhet të sigurohemi që vaksinat të prodhohen, gjë që është më e ndërlikuar”, nënvizoi ai duke shtuar se në Europë industritë farmaceutike janë të shumta.
“Vaksina ka nevojë për 400-500 përbërës të ndryshëm për t’u prodhuar në kohë reale. Nëse vetëm një prej tyre mungon, i gjithë zinxhiri ndërpritet”, shtoi ai.
