Në Kosovë, çdo herë për festën e 1 Majit, Ditës Ndërkombëtare të Punëtorëve, qytetarë të pandërgjegjshëm ndezin goma.Por, Ministrja e Mjedisit dhe Planifikimit Hapësinor Albena Reshitaj paralajmëron ndëshkime për të gjithë ata që ndezin goma.
“Ndezja e zjarreve dhe në veçanti gomave, për festën e 1 majit, janë veprime që do të ndëshkohen. Ligji për mbrojtjen e ajrit ndalon rreptësisht djegien e gomave. Po ashtu edhe Udhëzimi Administrativ për Ndëshkime me Gjoba Mandatore ndalon rreptësisht djegien e gomave, gjegjësisht gjoba është 100 euro”, thotë ajo.
Ndezja e gomave në mjedis të hapur liron dioksinën dhe materie tjera të rrezikshme që shkaktojnë probleme serioze shëndetësore, si dëmtimin e organeve të frymëmarrjes, kancerin e mushkërive, dëmton lëkurën duke shkaktuar edhe shumë probleme të tjera shëndetësore.
