Kombëtarja e Kosovës e ka mbajtur seancën e fundit stërvitore para ndeshjes kundër Sllovenisë.
Dardanët, të shtunën në mbrëmje, kanë stërvitur në stadiumin “Stozice” në Lubjanë, aty ku sonte në orën 20:45 do të zhvillojnë ndeshjen kundër sllovenëve në kuadër të Ligës C të Ligës së Kombeve.
Edhe në stërvitjen e fundit futbollistët punuan me përkushtim të madh, teksa dëshira për rezultat pozitiv është jashtëzakonisht e madhe.
Para stërvitjes në konferencën për media ndihmëstrajneri Muharrem Sahiti vuri në pah mungesat e shumta në ekip si dhe mungesën e minutazhës së lojtarëve në klubet e tyre, por edhe cilësitë e kundërshtarit, duke e vlerësuar këtë ndeshje si të vështirë. Megjithatë, ai shprehu besimin e tij dhe të stafit tek lojtarët për rezultat pozitiv.
