Presidenti i zgjedhur i SHBA-ve, Joe Biden ka bërë thirrje për t’i dhënë fund “sezonit të zymtë të ndarjes”, pasi vendi përballet me një dimër të gjatë dhe të vështirë me Covid-19.
Në një fjalim për festën e njohur Dita e Falënderimeve, ai tha se amerikanët ishin në luftë me koronavirusin, jo me njëri-tjetrin, përcjellë Klan Kosova.
SHBA pa më shumë se 1.2 milion raste javën e kaluar, me 2,200 vdekje të martën – numri më i lartë që nga fundi i majit.
Ndërkohë, Presidenti në largim, Donald Trump u bëri thirrje mbështetësve të punojnë për të përmbysur rezultatet e zgjedhjeve të 3 nëntorit.
Duke folur përmes telefonit nga Shtëpia e Bardhë për një ngjarje të organizuar nga ligjvënësit e shtetit republikan në Pensilvani, Trump përsëriti pretendime të pabazuara në lidhje me mashtrimet e përhapura elektorale.
“Ne duhet t’i kthejmë zgjedhjet,” tha ai, duke shtuar se ato ishin “të manipuluara”.
Trump pritej të merrte pjesë në këtë ngjarje personalisht, por udhëtimi u anulua pasi dy bashkëpunëtorë të avokatit të tij Rudy Giuliani dolën pozitivë për virusin. Giuliani mori pjesë personalisht.
Biden fitoi zgjedhjet me një fitore të rehatshme në votat e kolegjit elektoral dhe kalimi në presidencën e tij tashmë është në proces.
Përpjekjet e Trump për të sfiduar rezultatet në shtetet kryesore në gjykata deri më tani kanë dështuar.