Atmosfera e Krishtlindjes dhe Vitit të Ri ka disa ditë që është ndjerë edhe në qytetin e Elbasanit.
Kjo duket në dekorin e qytetit, i cili është zbukuruar me pemë dhe simbolet universale që paralajmërojnë ardhjen e Krishtlindjes dhe Vitit të Ri.
Të gjithë qytetarët elbasanas po përgatiten të festojnë këtë traditë të lashtë pagane që ka lënë gjurmë të thella edhe në kulturën tonë shqiptare.
Bashkia e Elbasanit ka zbukuruar qytetin me pemët e Vitit të Ri, simbol i kësaj feste në qendër të qytetit, por jo vetëm, ndërsa muret e lashtë të kalasë së qytetit, nisin të ndriçojnë sapo errësira mbulon qytetin, shkruan atsh.
Por, nuk janë vetëm muret rrethuese të kalasë, por e gjithë qendra e qytetit është zbukuruar me drita dekorative dhe shumëngjyrëshe, që paralajmërojnë ardhjen e festave.
Në këtë fund viti, është bërë traditë që qytetarët të shpenzojnë shuma parash për konsum, por nuk mungojnë edhe dhuratat e shumta që i shkëmbejnë me njëri-tjetrin, në veçanti për fëmijët.
Në mbrëmje rreth pemës së Vitit të Ri mblidhen me dhjetëra fëmijë të shoqëruar me prindër, për të bërë fotot të cilat i ruajnë si kujtim të albumet e tyre.
Ambientet e dekoruara të ftojnë të qëndrosh dhe të shijosh këtë bukuri që ndodh vetëm për festat e fundvitit.
