Ansambli Kombëtar i Këngëve dhe Valleve “Shota”, për nderë të festave të muajit nëntor, dhe vitit mbarëkombëtar të gjergj Kastrotit-Skënderbeut, do të shfaqë koreodramën “Kumt”, që i kushtohet heroit kombëtar.
Shfaqja do të jepet në disa qytete, atje ku ka shqiptarë.
Shfaqja “Kumt”, e cila pas premierës së dhënë në muajin shtator në Prishtinë, është shfaqur gjatë tetorit edhe në qytetin e Dibrës dhe Kërçovës, në Maqedoni.
Ajo u shfaq edhe në Podujevë me datën 19 të këtij muaji.
Ndërsa nesër, me datë 21 shfaqet në teatrin “Turbina” në Tiranë, me datë 22 në Shtëpinë e Kulturës në qytetin e Tetovës, me datë 27 në qytetin e Gjilanit dhe me datë 28 Nëntor, në Ulqin.
Në Ulqin në këtë datë, në organizim të Unionit të Shqiptarëve në Mal të Zi, do të vendoset edhe busti i Skënderbeut.
Në këtë kohë Ansambli do të jetë i angazhuar edhe me datë 24 Nëntor, në qytetin e Mitrovicës, në hapje të turnirit Ndërkombëtar të Boksit “Adem Jashari” dhe me datë 25 Nëntor në qytetin e Prizrenit, në manifestimin kulturor, të organizuar , me rastin e vendosjes së shtatoreve të udhëheqësve të Lidhjes Shqiptare të Prizrenit./OxygenPress.info