4 tetori, Dita botërore e kafshëve

4 tetori shënohet si dita botërore e kafshëve. Kjo ditë, ka për qëllim ndërgjegjësimin e njerëzve për padrejtësitë që i bëhen botës shtazore, por edhe që të nxisë organet shtetërore të respektojnë dispozitat ligjore, për kujdesin dhe mbrojtjen e kafshëve. Të dhënat e Unionit Botëror për Mbrojtjen e Natyrës, deklarojnë se 21 për qind e të gjitha llojeve të gjitarëve të njohur janë të rrezikuar, 30 për qind e ujorëve, 12 për qind e zogjve, 28 për qind e zvarranikëve, 37 për qind e peshqve dhe 35 për qind e jokurrizorëve.

Dita botërore e kafshëve festohet ç’do vit në datën 4 tetor. Fillimet e saj i ka në vitin 1931 në Firence të Italisë, ku në një konventë të ekologjistëve të asaj kohe u vendos 4 tetori si dita botërore e kafshëve. Në këtë ditë në forma të ndryshme festohet jeta e kafshëve dhe ngjarje të veçanta planifikohen në të gjithë globin.

4 tetori u zgjodh si Dita Botërore e Kafshëve, pasi përkon me festën që festohet ndaj Shën Franceskos (Giovanni Francesco di Bernardone), i cili ishte një adhurues i natyrës dhe mbrojtës i kafshëve.

Në këtë ditë kushdo që ka mundësinë dhe dëshirën të ndihmojë qendrat e birësimit të kafshëve, strehimoret e kafshëve të rrugëve, me ndihma materiale apo dhe duke dhuruar dhe diçka nga koha jonë dhe duke ndihmuar vullnetarisht me angazhime të ndryshme.

T’i duam kafshët, këto qenie të pafajshme dhe të dashura me të gjithë ne.

Megjithatë, kjo ditë festohet tashmë në të gjithë botën, nga të gjithë adhuruesit e kafshëve, pa dallim feje, kombësie apo prejardhje. Në këtë ditë në të gjitha vendet organizohen takime të ndryshme, konferenca, takime me nxënës të shkollave, ku flitet rreth lidhjes dhe dashurisë që kafshët kanë për njerëzit dhe që ne duhet t’ua kthejmë në të njëjtën mënyrë.